Thirrje urgjente për rritje të numrit të ndërmjetësuesve romë dhe asistentëve të mësimdhënies
UNICEF-i u bën thirrje autoriteteve kombëtare dhe lokale që të rrisin numrin e asistentëve të mësimdhënies për fëmijët me aftësi të kufizuara në zhvillim dhe ndërmjetësuesve romë, si dhe të ofrojnë transport falas për në shkollë për ata fëmijë në nevoj
- Gjendet në:
- Crnogorski
- English
- Shqip
PODGORICË, 22 SHTATOR 2023 – Me rastin e fillimit të vitit të ri shkollor, UNICEF-i u bën thirrje autoriteteve kombëtare dhe lokale që të rrisin urgjentisht numrin e asistentëve të mësimdhënies për fëmijët me aftësi të kufizuara në zhvillim dhe ndërmjetësuesve romë, si dhe të ofrojnë transport falas për në shkollë për ata fëmijë në nevojë.
Si nënshkrues i Konventës së OKB-së për të Drejtat e Fëmijës, Mali i Zi është zotuar të sigurojë të drejtën e çdo vajze dhe djali për arsim cilësor dhe gjithëpërfshirës.
Kjo është mënyra e vetme që Mali i Zi të ulë varfërinë dhe të ofrojë mundësi të barabarta për të gjithë qytetarët e tij. Sigurimi i asistentëve të mësimdhënies për çdo fëmijë me aftësi të kufizuara në zhvillim në nevojë është thelbësor për ofrimin e arsimit gjithëpërfshirës me cilësi të lartë.
Për të siguruar arsim cilësor dhe gjithëpërfshirës, Ministria e Arsimit duhet të kryejë një analizë të plotë të situatës aktuale në lidhje me numrin dhe statusin e asistentëve të mësimdhënies, në konsultim me të gjithë akterët, përfshirë shkollat, kopshtet, mësuesit, specialistët e arsimit, asistentët, prindërit, si dhe fëmijët dhe të rinjtë.
Vetëm nëpërmjet njohurive dhe rekomandimeve të nxjerra nga kjo analizë, së bashku me të dhënat e përditësuara të regjistrimit për fëmijët me aftësi të kufizuara në zhvillim, Ministria e Arsimit mund të ndajë një numër të përshtatshëm të asistentëve të mësimdhënies në fillim të çdo viti shkollor dhe të sigurojë financimin e tyre të qëndrueshëm brenda sistemit arsimor.
Kur bëhet fjalë për arsimimin e fëmijëve romë dhe egjiptianë, rritja urgjente e numrit të ndërmjetësuesve romë dhe sigurimi i transportit falas janë të nevojshme për të rritur regjistrimin e këtyre fëmijëve në sistemin arsimor. Aktualisht, vetëm 16 për qind e fëmijëve romë dhe egjiptianë ndjekin institucionet parashkollore, 56 për qind përfundojnë shkollën fillore, ndërsa 3 për qind përfundojnë shkollën e mesme në Mal të Zi.
Ndërmjetësuesit romë nxisin një bashkëpunim më të mirë ndërmjet familjeve rome dhe egjiptiane dhe institucioneve arsimore.
Sipas të dhënave nga OJQ "HELP," janë vetëm rreth 40 ndërmjetësues romë në Mal të Zi dhe nuk ka financim të qëndrueshëm nga autoritetet kombëtare dhe lokale për të gjithë ndërmjetësuesit romë.
Arsimi cilësor për çdo fëmijë nga komuniteti rom dhe egjiptian është e vetmja mënyrë për të siguruar shpëtimin e tyre nga varfëria.
Prandaj, është thelbësore që urgjentisht të rritet numri i ndërmjetësuesve romë dhe të sigurohet transporti falas për të gjithë studentët në nevojë.
Përmirësimi i statusit të grupeve minoritare, veçanërisht atyre në situatat më të cenueshme, siç janë komunitetet rome dhe egjiptiane, është një nga kriteret për anëtarësimin e Malit të Zi në BE.