Shkollat për shekullin e 21-të
Më shumë se gjashtë mijë fëmijë dhe qindra mësues në rajonin më të varfër, në pjesën veriore të Malit të Zi, po marrin pjesë në transformimin e shkollave për shekullin e 21-të
- Gjendet në:
- Crnogorski
- English
- Shqip
PODGORICË, 8 mars 2024 – Në mënyrë që në shkolla të ndodhë revolucioni digjital, duhet t'u ofrojmë mësuesve trajnime në lidhje me pedagogjinë digjitale dhe t'i pajisim klasat me teknologji të re, përmes të cilave fëmijëve do ju bëhet e mundur përvetësimi i aftësive digjitale. Ky ishte mesazhi kryesor që u përçua nga prezantimi i ditës së sotme i iniciativës "Digjital, gjithëpërfshirës dhe transformues: Arsim cilësor për të gjithë", i cili u prezantua nga krerët e Ministrisë së Arsimit, Shkencës dhe Inovacionit, UNICEF, UNESCO, Organizata Ndërkombëtare e Punës (ILO) dhe OKB.
Kjo iniciativë synon të adresojë sfidat që vijnë nga revolucioni digjital duke krijuar mundësi për mbi gjashtë mijë vajza dhe djem në rajonin më të varfër, në pjesën veriore të Malit të Zi, për të zhvilluar aftësi digjitale në shkolla në baza ditore. Arsimi më cilësor për këta fëmijë do t'u sjellë atyre vende më të mira të punës në shekullin e 21-të dhe do t'i ndihmojë ata të thyejnë ciklin e varfërisë.
Ministrja e Arsimit, Shkencës dhe Inovacionit Andjela Jaksic-Stojanovic theksoi se mjedisi digjital është bërë një mjedis natyral për fëmijët dhe të rinjtë dhe se është detyrë e Ministrisë të sigurojë që shkollat të transformohen në mjedise që mbështesin fuqishëm zhvillimin e kompetencave digjitale dhe kompetencave të tjera të lidhura me qëllimet e arsimit dhe edukimit.
Pa kapacitete të mjaftueshme njerëzore në fushën e teknologjisë së informacionit dhe komunikimit, nuk do mund ta bëjmë realitet revolucionin digjital, as në sistemin arsimor dhe as në fusha të tjera, gjë që na çon në përfundimin se sistemi arsimor ka një rol kyç në procesin e transformimit digjital. Për këtë qëllim, përveç furnizimit të shkollave me pajisje kompjuterike, do të përpiqemi të punojmë pareshtur në krijimin e përmbajtjeve digjitale që do të përmirësojnë procesin arsimor dhe do t'u ofrojnë shkollave burime të mjaftueshme për modernizimin e mësimdhënies dhe punës së tyre.
Sinisha Sheshum, Shef i Zyrës së UNESCO-s në Sarajevë, theksoi se nga këndvështrimi i UNESCO-s, arsimi cilësor dhe gjithëpërfshirës është gur themeli i përparimit social dhe integrimi i tij me teknologjitë digjitale është thelbësor për promovimin e zhvillimit të barabartë dhe të qëndrueshëm. "Kjo është gjithashtu përgjegjësi e jona e përbashkët për brezat e ardhshëm," shtoi Sesum.
Specialistja e ILO-s në fushën e aftësive dhe punësueshmërisë, Alessandra Molz, tha se në kohë të ndryshimeve të shumta dhe të shpejta, kjo organizatë konsideron arsimin dhe aftësitë si mjetet më të rëndësishme për njerëzit për të naviguar përmes transformimit digjital, dhe për shoqërinë për të krijuar një të ardhme pune me fokus njeriun.
Sipas ushtruesit të detyrës së koordinatorit të përhershëm të OKB-së në Mal të Zi, Vladimir Gjorgjiev, projektet e përbashkëta të agjencive të OKB-së shërbejnë për të ofruar mbështetje të koordinuar teknike dhe eksperte për Qeverinë në arritjen e rezultateve sistematike.
“Kjo iniciativë financohet nga Fondi për Zhvillim të Përshpejtuar i Malit të Zi, i cili është krijuar për të konsoliduar fondet e donatorëve dhe për t'i drejtuar ato drejt iniciativave zhvillimore, duke i kushtuar vëmendje të veçantë grupeve më të cenueshme. Asgjë nuk e ilustron justifikimin e ekzistencës së Fondit aq qartë sa iniciativat si kjo – një projekt me vizion të qartë për mbështetjen e vendit që çon në përparim të qëndrueshëm të komuniteteve”, tha Gjorgjiev, duke falënderuar partnerët që kanë mbështetur Fondin deri më tani – Bashkimin Evropian dhe qeveritë e Malit të Zi, Zvicrës, Austrisë, Luksemburgut dhe Irlandës.
Zhvillimi i materialeve mësimore digjitale, trajnimi i mësimdhënësve dhe koordinatorëve të TIK-ut, pajisja dhe hapja e qendrave EdTech dhe organizimi i kampeve verore digjitale për nxënësit janë disa nga aktivitetet që do të zbatohen në kuadër të kësaj iniciative dyvjeçare. Përmbajtja digjitale do të jetë pjesë integrale e Shkollës Digjitale, e cila tashmë është zhvilluar nga Ministria e Arsimit, Shkencës dhe Inovacionit në bashkëpunim me UNICEF-in.