Mali i Zi urgjentisht të rris shkallën e imunizimit
Gjëra të thjeshta si një SMS, një telefonatë dhe një bisedë e hapur me ekspertin shëndetësor kanë rezultuar të jenë efektive
- Gjendet në:
- Crnogorski
- English
- Shqip
PODGORICË, 27 DHJETOR 2023 – Për shkak të shkallës së ulët të imunizimit, shumica e fëmijëve të vegjël në Mal të Zi janë në rrezik hospitalizimi apo edhe në rrezik vdekje në rast të shpërthimit të fruthit ose të sëmundjeve të tjera të parandalueshme me vaksinë.
Këtë vit, vetëm 56 për qind e fëmijëve të nivelit parashkollor janë vaksinuar kundër fruthit, shytave dhe rubeolës. Shifrat janë madje edhe më të ulëta për brezat e rinj, që shpërfaqë se më pak se një në pesë fëmijë janë të mbrojtur me kohë nga fruthi në vitin e dytë të jetës.
Për të përmirësuar imunizimin rutinë të fëmijëve, me mbështetjen e UNICEF-it dhe të BE-së, gjatë këtij viti Ministria e Shëndetësisë dhe Instituti i Shëndetit Publik kanë zbatuar ndërhyrje të shumta në të gjitha komunat duke përfshirë fushatën kombëtare të imunizimit, e cila rezultoi në mbrojtjen e pothuajse 2000 fëmijë të tjerë të nivelit parashkollor nga prekja e fruthit, shytave dhe rubeolës gjatë vitit 2023 në krahasim me vitin 2022.
Vlerësimi i fushatës i kryer nga Ipsos në nëntor të këtij viti në një mostër përfaqësuese kombëtare prej 1005 prindërve të fëmijëve deri në moshën 6 vjeç tregon se kjo fushatë ka qenë e suksesshme.
1 në 3 prindër kanë pranuar telefonatë nga Ministria e Shëndetësisë për të vaksinuar fëmijën e tyre dhe 1 në 2 prindër i kanë vaksinuar ata pasi kanë biseduar me ekspertin shëndetësor.
Gjatë 6 muajve të fundit, më shumë se një e katërta e prindërve të fëmijëve të moshës 1-2 vjeç kanë konfirmuar se kanë pranuar një SMS nga Instituti i Shëndetit Publik me një mesazh ditëlindjeje për fëmijën e tyre. Pas kësaj 1 në 4 prindër e kanë vaksinuar fëmijën e tyre.
Gjëra të thjeshta si një SMS, një telefonatë dhe një bisedë e hapur me ekspertin shëndetësor kanë rezultuar të jenë efektive në adresimin e shqetësimeve që një prind mund t’i ketë në lidhje me imunizimin. UNICEF rekomandon që institucionet kombëtare dhe shëndetësore të vazhdojnë të kontaktojnë çdo prind. Dëgjimi i tyre dhe biseda me ta është thelbësore. Kjo është edhe mënyra më e mirë për të forcuar besimin e familjeve në sistemin shëndetësor.
Kur bëhet fjalë për praktikat të cilat i rekomandojnë dhe i preferojnë prindërit në Mal të Zi, caktimi i vaksinimeve pa planifikim paraprak është një prej tyre, veçanërisht gjatë fundjavave.
Për shumicën e prindërve, mjekët pediatër janë burimi kryesor i informacionit për imunizim. Autoritetet më të besueshme për këtë çështje tek prindërit janë Instituti për Sëmundjet e Fëmijëve, Instituti i Shëndetit Publik, mjekët pediatër nga qendrat parësore shëndetësore, spitalet dhe mjekët në përgjithësi. Mediat sociale mbeten si burim informacioni për imunizime vetëm për disa prindër, veçanërisht për ata më të rinj të moshës 18-29 vjeç. Duke pasur parasysh numrin e dezinformatave dhe lajmeve të rreme që qarkullojnë në media sociale, është e rëndësishme që autoritetet kombëtare dhe lokale të promovojnë edukimin mediatik në mënyrë që të gjithë prindërit të dinë se si të kontrollojnë saktësinë e informacionit dhe se si të gjejnë burime të besueshme.
Aplikacioni Bebbo i UNICEF-it, i cili udhëzon prindërit në fazat e ndryshme të zhvillimit të fëmijëve të tyre nga mosha 0 deri në 6 vjeç, është gjithashtu një burim i rëndësishëm informacioni për imunizim. Aplikacioni Bebbo u prezantua në Mal të Zi në vitin 2022 në partneritet me Institutin për Shëndet Publik dhe me mbështetjen e BE-së. Si rezultat, 1 në 2 prindër përdorin aplikacionin Bebbo. Dy të tretat e shohin aplikacionin si të dobishëm për informim rreth imunizimit të fëmijëve. 9 në 10 prindër ua rekomandojnë prindërve të tjerë aplikacionin Bebbo.