Më shumë klasa dhe mësues për të gjithë fëmijët
Disa kopshte dhe shkolla në Mal të Zi kanë nevojë për një zgjerim ose përshtatje të ambienteve të tyre
- Gjendet në:
- Crnogorski
- English
- Shqip
Tivat dhe Budvë, 24 gusht 2022– Shkollat dhe kopshtet në Mal të Zi duhet të kenë hapësirë dhe burime të mjaftueshme për të siguruar arsim cilësor për të gjithë fëmijët. Është e drejta e tyre dhe përgjegjësia jonë. Ky është mesazhi që dërguan dje Sekretarja e Shtetit në Ministrinë e Arsimit Milijana Vukotic Jelusic, përfaqësuesi i UNICEF-it në Mal të Zi, Juan Santander, dhe zëvendëskryetarja e Ambasadës së Ukrainës në Mal të Zi, Natalia Fialka, gjatë vizitave të tyre në shkollat dhe kopshtet e Budvës dhe Tivatit.
Përfaqësuesit e të tre institucioneve kanë biseduar me drejtorët e shkollave dhe kopshteve, përfaqësues të autoriteteve vendore dhe prindër për të gjetur së bashku zgjidhje për problemin e mungesës së hapësirave në institucionet arsimore.
Sipas Analizës së Sektorit të Arsimit, e cila së shpejti do të publikohet nga Ministria e Arsimit dhe UNICEF, dy nga tre fëmijë në Mal të Zi ndjekin shkollat fillore, infrastruktura fizike e të cilave është e pamjaftueshme për ta. Në kopshte, numri mesatar i fëmijëve e kalon normën maksimale prej 25, në disa raste me një diferencë të madhe.
Një sfidë shtesë për shkollat e mbipopulluara është pranimi dhe përfshirja e fëmijëve refugjatë që duhet t'i përshtaten procesit të mësimdhënies dhe gjuhës lokale.
Sekretarja shtetërore Vukotic Jelusic theksoi se Ministria e Arsimit është duke punuar në ndërtimin dhe përshtatjen e objekteve, në bashkëpunim me huadhënës të shumtë.
“Informacionet që kemi në lidhje me migrimin e brendshëm dhe të jashtëm thonë se komunat në jug janë nën presionin më të madh nga fluksi i popullsisë, e rrjedhimisht edhe i nxënësve”, tha Vukotic Jelusic.
Ajo tha se qëllimi i ministrisë është të mundësojë integrimin dhe socializimin e fëmijëve nga Ukraina. “Kur bëhet fjalë për fëmijët e moshës parashkollore, ne do të ofrojmë fonde për strehim dhe ushqim. Sa i përket shkollave fillore dhe të mesme, ne do të ofrojmë kuota shtesë të regjistrimit”, tha Vukotic Jelusic.
Përfaqësuesi i UNICEF në Mal të Zi, Juan Santander, përmendi shembullin e shkollës fillore Drago Milovic në Tivat, e cila ishte projektuar për 550 nxënës, por aktualisht ka rreth 1,700 prej tyre.
“Çdo fëmijë në Mal të Zi ka të drejtë për arsim cilësor. Ai arsim fillon me numrat e duhur, hapësirën adekuate, cilësinë e objekteve shkollore dhe vazhdon me një numër adekuat mësuesish, të cilët kanë nevojë edhe për mbështetje. Ky është një problem i kahershëm që ka rënduar sistemin arsimor në Mal të Zi prej vitesh,” tha Santander.
Ai shtoi se fëmijët nga Ukraina, si dhe fëmijët nga komunitetet pakicë dhe fëmijët me aftësi të kufizuara, kanë nevojë për mbështetje shtesë për mësimin e gjuhës, mbështetjen psiko-sociale dhe organizimin e transportit.
“Shumë fëmijë në Mal të Zi shkojnë në shkolla që nuk janë ndërtuar për numrin e nxënësve që i ndjekin aktualisht. UNICEF, së bashku me Ministrinë e Arsimit, komunat, stafin mësimdhënës dhe prindërit, mbetet i përkushtuar për zgjidhjen e këtij problemi, në afat të shkurtër dhe afatgjatë”, theksoi Santander.
Zëvendëskryetarja e Ambasadës së Ukrainës, Natalia Fialka, tha se sfida më e madhe për fëmijët nga Ukraina është mungesa e dokumenteve.
“Shumë prindër u larguan nga Ukraina pa të gjitha dokumentet e nevojshme për të regjistruar fëmijët e tyre në shkolla dhe kopshte. Gjithashtu, një problem i madh është edhe pengesa gjuhësore. Falë organizatave ndërkombëtare arritëm që gjatë verës të organizojmë kurse të gjuhës malazeze”, tha Fialka.
Në takim, prindërit e fëmijëve nga Ukraina theksuan se qëndrimi më i gjatë në shkolla dhe kopshte do të ishte më i rëndësishëm për ta dhe përmendën se mungojnë vendet për aktivitete jashtëshkollore dhe shoqërim.
Santander dhe Fialka u takuan me kryetarët e komunave të Tivatit dhe Budvës, Zeljko Komnenovic dhe Milo Bozovic, të cilët së bashku me sekretarin shtetëror të Ministrisë së Arsimit, Vukotic Jelusic, shprehën mbështetjen e tyre për zgjerimin e kapaciteteve të shkollave dhe kopshteve.