Fëmijët nën moshën 1 vjeç nuk duhet të qëndrojnë para ekranit
Gjatë festave të Vitit të Ri dhe pushimit dimëror, UNICEF u bën thirrje të gjithë prindërve që t'ua kufizojnë fëmijëve kohën e qëndrimit para ekranit
- Gjendet në:
- Crnogorski
- English
- Shqip
PODGORICË, 29 DHJETOR 2023 – Me rastin e festave të Vitit të Ri dhe pushimit dimëror, UNICEF u bën thirrje të gjithë prindërve që të t'ua kufizojnë fëmijëve kohën e qëndrimit para ekranit dhe të flasin me ta për përmbajtjet mediatike që ata shikojnë.
Roli i prindërve është vendimtar për t'u siguruar që fëmijët të kalojnë kohë të kufizuar para ekranit dhe që ata të kalojnë kohë duke shikuar programe që janë të dobishme për zhvillimin e tyre. Prindërit gjithashtu kanë një rol kyç në zhvillimin e edukimit mediatik të fëmijëve duke u folur për të gjitha mesazhet mediatike.
Organizata Botërore e Shëndetësisë (OBSH) rekomandon që fëmijët nën 1 vjeç të mos kalojnë fare kohë para ekranit dhe që ata nën 5 vjeç të kalojnë maksimum deri në një orë në ditë. Vonesat në zhvillim dokumentohen me rritjen e kohës para ekranit gjatë viteve të para të jetës. Koha e tepërt para ekranit gjithashtu i privon fëmijët nga ndërveprimi me fëmijët e tjerë dhe familjen e tyre, gjë që është thelbësore për zhvillimin e tyre.
Nëse zgjidhet siç duhet, media mund t'u sjellë fëmijëve mundësi mësimi dhe edukimi. Që kjo të ndodhë, është thelbësore që prindërit të mbështesin edukimin mediatik të fëmijëve që nga fëmijëria e hershme, duke i ndihmuar ata të zgjedhin me mençuri përmbajtjet që do t'i shikojnë dhe të diskutojnë me ta, në mënyrë që fëmijët të zhvillojnë aftësi për të analizuar në mënyrë kritike të gjitha mesazhet mediatike.
Sipas anketës përfaqësuese kombëtare të Ipsos, të kryer në Mal të Zi në nëntor të vitit 2023, 1 në 3 prindër shpesh i lënë fëmijët të shikojnë video-përmbajtje në kompjuter, laptop ose tablet kur u nevojitet kohë pa zhurmë në shtëpi për të përfunduar punën ose detyrat e tjera.
2 në 5 prindër nuk e kufizojnë kohën dhe zgjedhjen e përmbajtjes mediatike që shikojnë fëmijët e tyre.
Gjysma e prindërve nuk u flasin fëmijëve për atë që mund të shikojnë në TV apo internet.
