Qeveria e re të ofrojë kujdes shëndetësor cilësor për çdo nënë dhe fëmijë
UNICEF dhe Shoqata e Prindërve u bëjnë thirrje të gjithë aktorëve politikë që të zotohen për të investuar fonde të mjaftueshme për përmirësimin e standardeve në maternitete
- Gjendet në:
- Crnogorski
- English
- Shqip
PODGORICË, 2 QERSHOR 2023 – Në përgjigje të gjetjeve kryesore të vlerësimeve të mëparshme dhe të vazhdueshme të materniteteve dhe njësive të neonatologjisë në Mal të Zi, Fondi i Kombeve të Bashkuara për Fëmijët - UNICEF dhe OJQ Shoqata e Prindërve u bëjnë thirrje të gjithë aktorëve politikë që të zotohen për të investuar fonde të mjaftueshme në përmirësimin e kujdesit shëndetësor të lehonave dhe të porsalindurve në mënyrë që çdo nëne dhe foshnje në Mal të Zi t'i sigurohet kujdesi adekuat.
Si nënshkrues i Konventës për të Drejtat e Fëmijës, Mali i Zi është zotuar t'i sigurojë çdo vajze dhe djali të drejtën për fillimin më të mirë të jetës dhe kujdesin shëndetësor cilësor.
Përafërsisht 7000 fëmijë lindin në Mal të Zi çdo vit. Pavarësisht përpjekjeve të disa materniteteve, asnjë maternitet apo qendër për të porsalindur aktualisht nuk përmbush plotësisht standardet për foshnje, nëna dhe familje të rekomanduara nga standardet ndërkombëtare për të siguruar fillimin më të mirë në jetë dhe kujdesin cilësor për nënat dhe të porsalindurit.
Cilësia e kujdesit në maternitete dhe qendrat e të porsalindurve prek çdo foshnje, çdo nënë e baba dhe çdo familje në vend. Prandaj i bëjmë thirrje të gjithë aktorëve politikë që të bashkohen për fëmijët dhe nënat e Malit të Zi duke u zotuar se do të mbështesin përmirësimin e kujdesit shëndetësor për lehonat dhe të porsalindurit në periudhën e ardhshme.
Pothuajse të gjitha gratë në Mal të Zi lindin në institucionet shëndetësore.
Vlerësimi i mëparshëm i cilësisë së kujdesit spitalor për nënat dhe të porsalindurit, i porositur nga Ministria e Shëndetësisë dhe UNICEF në vitin 2016, si dhe Vlerësimi që është duke u bërë për vitin 2023, nxjerrin në pah një sërë çështjesh që duhen adresuar, dhe të cilat kanë të bëjnë me mungesën e personelit, trajnimin e pamjaftueshëm të punonjësve shëndetësor në spitale, tregues se disa procedura të vjetruara apo të dëmshme ende zbatohen, si dhe nevoja për përmirësimin e kushteve në hapësirën fizike.
Vlerësimet tregojnë gjithashtu nevojën për përmirësime në fushën e mbledhjes së të dhënave dhe zhvillimin e udhëzimeve dhe protokolleve kombëtare, si dhe vlerësimin sistematik të kënaqësisë së përdoruesve me cilësinë e kujdesit dhe shërbimeve të ofruara.
Kujdesi për fëmijën, si në familje ashtu edhe në të gjithë shoqërinë, duhet të fillojë që para ngjizjes dhe duhet të jetë prioriteti numër një për çdo qeveri, përfshirë edhe atë të radhës. Të kujdesesh për fëmijët do të thotë të kujdesesh edhe për familjen, pra edhe për nënat e ardhshme, në momentet kur ato janë më të ndjeshme, ndaj kanë nevojë për kujdesje dhe vëmendje më të madhe. Nënat tona dhe foshnjat e tyre presin kujdes dhe shërbim cilësor shëndetësor dhe kjo duhet të nënkuptohet.
Programi "Maternitetet të përshtatura për foshnjat" është futur në spitalet malazeze në intervale të ndryshme kohore që nga viti 1995, por është arritur përparim i kufizuar.
Një iniciativë kyçe e këtij programi lidhet, ndër të tjera, me sigurimin e kontaktit lëkurë më lëkurë midis çdo foshnjeje dhe nënës dhe ushqyerjen me gji menjëherë pas lindjes së foshnjës.
Megjithatë, vetëm një në tre foshnje ka kontakt lëkurë më lëkurë me nënën, dhe një nga katër nëna në Mal të Zi e ka ushqyer fëmijën me gji në orën e parë pas lindjes.
Standardet e materniteteve dhe qendrave të përshtatura për nënat dhe familjet përfshijnë edhe aspekte të tjera, si: prania e një shoqëruesi në lindje sipas zgjedhjes së lehonës, për shembull prania e partnerit, të afërmes, mikut; pastaj respektimi i privatësisë së nënës gjatë dhe pas lindjes; ulja e shkallës së prerjeve cezariane të panevojshme; eliminimi i epiziotomisë rutinë dhe procedurave të tjera mjekësore të panevojshme, si dhe ndarjes së panevojshme të nënave dhe foshnjave.
