Eny an-kianja mamorona fandaharan’asa eny ifotony iadiana amin’ny tsifanjariantsakafo
Na teo aza ny asa natao nandritry izay roa taona farany izay dia mbola mampanahy ny toe-draharaha maha-olona any amin'ny tapany atsimo-atsinanana. Tokony atao laharam-pahamehana ny zava-misy iainan'ny vondrom-piarahamonina eny ifotony.
Vao maraina dia tonga tamin’ny lakana haingam-pandeha teny amin’ny tanànan’Ampadimana, any atsimo atsinanan’i Madagasikara ny ekipan’ny tobim-pitsaboana mandehandeha ao anatin’ny fikambanana Médecins du Monde, tohanan’ny UNICEF.
Eo akaikin’ny afisy momba ny fisorohana sy ny fanentanana amin'ny fanararaotana sy fitrandrahana ara-nofo (PSEA), misy tovovavy roa mandinika akaiky azy ireo mikarakara ny fipetrahana eo an-toerana.
Ny hetsika dia manomboka amin'ny asa fanentanana mikasika ny herisetra mifandraika amin’ny maha-lahy sy vavy, tarihin'i Mariel (manao akanjo fotsy), mpiasa sosialy.
Raharimanana Angela, mpitsabo mpanampy, no mandray an-tanana ireo zaza tratran’ny tsy fahampian-tsakafo. “ Tsy maintsy mandinika tsara ny tranga tsirairay aho mba hanampiana azy ireo bebe kokoa, » hoy i Angela.
Rehefa tsikaritra ny fitomboan-danja teo amin'i Erica, 8 volana, dia nomena vitamina A izy mba hampirindra ara-dalàna ny hery fiarovana ao aminy.
Manolotra sakafo ara-pahasalamana ho an'ilay fianakaviana i Angela, sakafo izay nomen'ny UNICEF sy ireo mpamatsy vola toa an’ny USAID, ny Tahirim-bola foibe ho an’ny fiatrehana vonjy taitra (“Central Emergency Response Fund”), ny Governemanta Japoney ary ny Vaomiera Eoropeana momba ny fanampiana maha-olona..
Hitan’i Erica fa faly ny reniny noho ny fitomboan’ny lanjany. « Ny rivodoza nifanesy dia nametra ny fahazoana sakafo, ka nahatonga an'i Erica ho tratran'ny tsy fahampian-tsakafo. Mahatsiaro maivamaivana aho mahita fa mihatsara kokoa izy, » hoy i Arcile.
I Angela dia ampian'i Desiré, izay mpanentana ara-pahasalamana nandritra ny 33 taona. Sahiran-tsaina ny renin’ilay marary manaraka, 29 volana, rehefa hitany fa very 100g ny zanany vavikely hatramin’ny nanaovana fizaham-pahasalamana farany.
Taorian'ny fikarakarana ara-pahasalamana dia nangatahana izy mba hanantona an'i Mariel, tompon'andraikitra amin'ny fanohanana ara-tsaina sy ny famantarana ny antony nahatonga io fihenan-danja io.
Amin'ny alàlan’ny fampiasana ny vatakely misy kisary no hanomezan’i Mariel azy ny torohevitra momba ny sakafo tokony harahina. « Ilaina ny miresaka amin'ny marary satria ahafahana mahita vahaolana miaraka izany, » hoy izy.
Ekipa iray hafa no manara-maso ny hafanan'ny marary tsirairay alohan'ny hanaovana ny fizaham-pahasalamana any ivelany, izay tanterahina eo akaikin'ilay efitrano ihany.
Nanavy i Lorie, 10 taona, nandritra ny roa andro. Voamarina fa tratran’ny tazomoka izy taorian’ny fitiliana natao azy. Tamin'io andro io, marary efatra tamin'ireo notiliana no voaporofo fa lasibatry ny tazomoka ihany koa.
Renim-pianakaviana manan-janaka niharan’ny tsy fahampian-tsakafo mahery vaika ao amin’ny hopitaly Mananjary. Ny fanadihadiana farany momba ny fiahiana ara-tsakafo sy ny fahatomombanana ara-tsakafo dia nampiseho fa trangana tsy fanjarian-tsakafo mahery vaika mahatratra 459.000 no mety ho hita eo anelanelan'ny volana Oktobra 2023 sy Janoary 2024.
Na dia teo aza ny havizanana dia mbola nanohy ny fandehanana tamin’ny lakandranon’i Pangalane ihany i Mariel. Izy dia nijoro ho vavolombelon’ny ezaka notontosaon'ireo mpiantsehatra rehetra, mba hiatrehana izany krizy maha-olona izany. Mampifanaraka hatrany ny hetsika tanterahany izy ireo, amin'ny alàlan’ny fanindriana manokana ny fandraisan'anjaran'ireo vondrom-piarahamonina marefo sy mipetraka amin’ny toerana lavi-dàlana.
