Mankany amin’ny fanatsarana ny fitantanana ny fako eny anivon’ny fiarahamonina an-tanàn-dehibe
Fanafoanana sy fanodinana toerana fanariam-pako iray tsy voafehy mba ho lasa toerana mampidi-bola: ohatra iray ao Fenoarivo atsinanana, any atsinanan’i Madagasikara
Toy ny ankamaroan’ireo tontolo an-tanàn-dehibe, ny fitantanana ny fako dia tena mbola fanamby lehibe ho an’ny kaominina ambanivohitr’i Fenoarivo atsinanana, any atsinanan’i Madagasikara. Efa an-taonany maromaro izay no nanaovan’ny mponina fanariam-pako ny ampahan-tany iray ao amin’ny tanàna iray. Ireo zavatra nariana teo (tatin-jaza fanary, lamba fampiasa amin’ny fadim-bolana fanary, fatim-biby, sns) no nahatonga ny fahalotoan’ny rivotra, ka vao mainka nanelingelina ny mpiara-monina. Mety handoto ny rano ambanin'ny tany ihany koa izany, kanefa ny ankamaroan’ny mponina manodidina dia mampiasa ny fantsakana ho loharanon-drano hisotroana sy handrahoana sakafo.
Tamin'ny Oktobra 2022, ny UNICEF miaraka amin'ny fanohanana ara-teknika avy amin'ny Wateraid dia namolavola fandaharan'asa « Fanohanana ny fanatsarana ny fisitrahana tolotra mahakasika ny rano, fanadiovana sy fidiovana nohatsaraina ho an'ny mponina ao amin'ny kaominina an-drenivohitra Fenoarivo atsinanana. » Anisan’ny zavatra sahanin’izany fandaharan’asa izany ny fanohanana ny kaominina amin’ny fanombohana ny fampiharana ny rafi-pitantanana ny fako sy ny fametrahana amin’ny fomba ofisialy ny sampan-draharaha ara-teknika misahana ny rano, fanadiovana ary ny fitantanana ny fanadiovana ireo làlam-bahoaka. Ankoatra izay, mba hiantohana ny fampandehanan-draharaha eo anivon’ ny kaominina dia notohanana ihany koa izy amin’ny famolavolana ny fitsipika mifehy ny fahadiovana ao anatin’io kaominina io, izay notanterahina tamin’ny fomba ofisialy sy nampahalalàna ny mponina nanomboka ny volana septambra. Teny anivon’ny tokantrano dia nanentana ireo mpilatsaka an-tsitrapo teny an-toerana ny fandaharan’asa amin’ny maha-mpiandraikitra ny fampiroboroboana ny fanadiovana sy ny fidiovana azy ireo; ka nisy ny hetsika momba ny fampahalalam-baovao, ny fanabeazana, ny serasera, ary ny fanentanana izay notontosaina.
« Faly aho fa nanadio ny taniko ny mponina. Tombontsoa roa no azo amin’izany ankehitriny: fanajariana izay manampy ny olona hivoatra amin'ny alàlan'ny asa fampidiram-bola sy fotodrafitr’asa hitantanana ny fako ao anatin'ity vondrom-piarahamonina ity. Rehefa nangataka alàlana tamiko ny kaominina mba hametrahana dabam-pako eo dia tsy nisalasala aho nanome ny fanomezan-dàlana, » hoy Rtoa Thomasse, mpampianatra misotro ronono sady tompon’ny tany. Raha ny marina, nanatona azy ny ekipa mpanatanteraka ny fandaharan’asa mba handresena lahatra azy ny amin'ny ilàna ilay fomba fiasa.
Manodidina ny fianakaviana folo any ho any no mahazo tombony amin’ny fanofana tranoeva, ka afaka mivarotra asatanana vita eo an-toerana, legioma, akanjo vita zaitra, saribao izy ireo... ary ilay dabam-pako indray kosa dia mamporisika ho amin’ny fanovana fitondran-tena. Nohamafisin’ireo mponina mivarotra eo amin’ilay tranoeva : « hatry ny nisian’ity asa ataonay ity dia tsy misy sahy manary fako eto ary manara-maso ny fampiasana ny dabam-pako izahay mba hadio sy ho mahasalama hatrany ny tontolo iainana andavanandronay. »
Efa nisy olona nanandrana nanangona fako isan-tokantrano tamin’ny alàlan’ny sarety hazo na borety. Amin’izao fotoana izao dia nitondra fanatsarana ilay fandaharan’asa, tamin'ny alàlan’ny fanamafisana ny fahaiza-manaon’ireo olona ireo sy ny isan’izy ireo mba handrakotra ny faritra manontolo. Araka izany, ireo tompon’andraikitry ny fanangonana fako dia manatanteraka ny asany eo ambany fiahian’ny sampan-draharaha ara-teknika misahana ny rano, fanadiovana sy fidiovana ary fanadiovana ny làlam-bahoaka, amin'ny amin'ny alàlan'ny fampiasana fitaovana sahaza kokoa. Sarety folo vita amin’ny vy, môtô misy kodiaran-telo, dabam-pako azo esorina miisa folo, dabam-pako vita amin’ny antsasaka barika miisa 70 no natolotra ho ampiasain’ny tokantrano maherin’ny 18 000.
Amin’ny faran’ity dingana ity, mandinika ny fomba hampiasana ny fako sy ny tanjona farany amin’izany ny kaominina amin’izao fotoana izao mba hananana rafitra feno. Nisy olona vao tsy ela akory izay no naneho fa liana amin’ny fanodinana sy fikarakarana izany fako izany izy ireo.