Eto Madagasikara, ny fisitrahana fanadiovana, antoky ny fahasalamana
Ny fisian’ny fanadiovana sahaza eny amin’ny tobim-pahasalamana ao amin’ny kaominina Tanambao, any atsinanan’i Madagasikara dia manosika ny vehivavy hanao laharam-pahamehana ny fahasalamany.
Ao amin’ny Tobim-pahasalamana Fototra II – CSB II – Tanambao Verrerie, 5 km latsaka avy eo afovoan-tanànan’i Toamasina, atsinanan’i Madagasikara, dia vehivavy maromaro no miandry amim-paharetana mba hahafahan’izy ireo misitraka fizaham-pahasalamana mialohan’ny fiterahana. Ilay toby tokoa mantsy dia manome tolotra fanaovana vaksiny, fanaraha-maso ny fitondrana vohoka sy ny fiterahana ary ny fitsaboana nify.
Dr Fenosoa Rasoamampionona no lehiben’ny mpitsabo ao amin’izany CSB II izany. Teo amin’ny faha-45 taonany dia nisafidy ny ho mpitsabo izy noho ny faniriany hanakaiky ny fiaraha-monina mba hahafahany manampy azy ireo bebe kokoa. « Ny asako dia natao hanasoavana ny mponina, » hoy izy.
Eto Madagasikara, amin’izao fotoana izao, ny antsasa-manilan’ireo tobim-pahasalamana dia tsy manana loharanon-drano nohatsaraina ary manodidina ny 60% ihany no manana lava-piringa ara-dalàna (1). Ny CSB II Tanambao Verrerie dia tsy niavaka tamin’io toe-javatra io, satria lava-piringa iray ihany no ampiasain’ny marary sy ny mpitsidika ary ny mpiasan’ny tobim-pahasalamana. « Tsy mahafeno ny filànay ny lava-piringa iray ary maloto hatrany ny manodidina. Tsy ara-pahasalamana izany ho an'ny tobim-pahasalamana, » hoy ny Dr Rasoamampionona.
Noho ny fanohanana mahafatra-po avy amin'ny "We Are Water Foundation", tamin'ny alàlan'ny Komitim-pirenena Espaniola ho an'ny UNICEF, dia afaka nisitraka trano fidiovana misy efitra telo ny tobim-pahasalamana, ka ahitana lava-piringa sy trano fandroana izany.
Ny fanamboarana ireo lava-piringa vaovao ireo dia nisy fiantraikany lehibe teo amin’ny isan’ny mpitsidika ny tobim-pahasalamana, indrindra teo amin’ireo vehivavy. « Hatramin’ny nanarenana ireo fotodrafitrasa eto aminay ireo dia nitombo avo roa heny ny isan’ny vehivavy manao fizaham-pahasalamana sy miteraka eto aminay; lasa 70 isam-bolana izany ankehitriny raha toa ka 30 izany teo aloha. Zava-dehibe ny fahazoana fotodrafitr’asa manara-penitra mba hisorohana ny aretina, » hoy izy. Ny fampiasana izany toera-pidiovana vaovao izany dia itakiana sarany amin’ireo mpampiasa azy ireny mba hiantohana ny fahadiovany.
Mandray anjara betsaka amin'ny kalitaon'ny fikarakarana ara-pahasalamana ny tolotra mahakasika ny rano sy fanadiovana. Ho an’ireo vehivavy manatona ny CSB II Tanambao, toy ny ankamaroan’ireo vehivavy eto Madagasikara, dia tsy azo lavina ny maha zava-dehibe ny fanadiovana tsara kalitao, mba hiantohana ny fahasalaman’ny reny, ka hiantohana ny fahasalaman’ny zaza vao teraka ihany koa.
(1) Minisiteran'ny Fahasalamam-bahoaka – Drafitra Fampandrosoana ny sehatry ny Fahasalamana 2020 – 2024
Ny trano fivoahana vaovao naorina teo amin’ny CSB II Tanambao Verrerie nohon’ny fanohanan’ny « We Are Water Foundation », tamin’ny alàlan’ny Komitim-pirenena Espaniola ho an’ny UNICEF.
