Fitananana ny andraikitry ny mpiasa sosialy sy fanampiana amin’ny famonjena aina.
Ny mpiasa sosialy, toy ny dokotera sy ny polisy mpanao fanadihadiana heloka bevava, dia matetika manatrika ireo fotoan-tsarotra indrindra izay iainan’ireo olona omeny fanohanana. Toa an'i Riantsoa Rakotoarimanana miasa ao amin'ny Centre Vonjy Antananarivo
Ny mpanao asa sosialy, toy ny dokotera sy ny polisy mpanao fanadihadiana heloka bevava, dia matetika manatrika ireo fotoan-tsarotra indrindra iainan'ireo olona tohanany. Nandritra ny sivy taona no nanaovan’i Riantsoa Rakotoarimanana izany asa izany tao amin’ny Foibe Vonjy Antananarivo.
Niasa tao amin’ny Centre Vonjy i Riantsoa Rakotoarimanana, ivotoeram-pikarakarana ireo ankizy niharan’ny herisetra ara-nofo nanomboka ny taona 2015. Izy no tompon’andraikitra amin’ny fandraisana an-tanana ara-psikolojika ireo ankizy lasibatry ny herisetra ara-nofo sy ny fianakavian’izy ireo, ary sokajiany ho toy ny “fandraisana andraikitra goavana” izany. "Ny asanay dia mitaky anay hanana saina tsy miangatra amin'ny fotoana rehetra manoloana ireo niharam-boina, hifehy tsara ny fihetseham-ponay manoloana ireo zavatra mampihetsi-po samihafa avy amin'ireo niharam-boina ary koa ireo olona mpanaraka azy," hoy izy.
Ny fanamby dia mitranga isan'andro ary mitaky toetra izay naorina tamin'ny traikefa. « Mila traikefa tsara ny fananana fo mangoraka sy ny fihainoana amin’ny fomba miabo. Matetika eto dia mihoatra lavitra noho ny fahafahanay ara-batana sy ara-tsaina ny isan’ireo olona lasibatra mila fanohanana tonga isan’andro, » hoy i Riantsoa. Miara-miasa amin'ny mpiasa sosialy iray hafa izy ary izy ireo miaraka dia mandray an-tanana tranga mihoatra ny zato isam-bolana. « Ny fanatanterahana izany asa izany rehefa matihanina sy manana mari-pahaziana amin'ny lafiny asa sosialy dia tombony lehibe. Soa ihany koa fa manohana ahy ny vadiko sy ny zanako roa, ary mbola lafin-javatra tsara iray hafa koa izany, » hoy izy. Tena mety ho zava-doza goavana ny fiantraikan’izany toe-javatra izany amin'ny fiainam-pianakaviana manokana.
Ny herisetra ara-pananahana amin'ny ankizy dia misy voka-dratsy lehibe sy maharitra eo amin'ny fahasalaman'ny vatana sy ny sain'ireo niharam-boina ary koa ny lalan-kizorany amin’ny lafiny ara-panabeazana, arak’asa ary ara-pihetseham-po. Izany indrindra no nahatonga ilay mpanao asa sosialy nanome toky ireo niharam-boina sy ny fianakaviany raha vao tonga tao amin’ilay toby izy ireo. Ilay mpiasa sosialy dia miezaka ihany koa mametraka fifandraisana arahina fifampitokisana, izay miantoka ny fizotran'ny fanohanana manontolo, ary koa mba hampiroboroboana ny fanehoana ny fihetseham-po, ny famerenana indray ny fifampitokisana eo amin'ny ray aman-dreny sy ny zanaka na koa ny famerenana ny fahatokisan-tena araka ny herin’ireo niharam-boina. Miara-miasa amin'ny mpikambana hafa ao amin'ny tambajotra misehatra amin'ny fiahiana ny ankizy ihany koa io mpiasa sosialy io mahakasika ireo hetsika famerenana eo anivon’ny fianakaviana, tontolon'ny sekoly na eny anivon'ny fiaraha-monina.
Fanamafisana ny fanabeazana avy amin’ny ray aman-dreny
Mampivarahontsana ny fitombon’ny isan’ny tanora iharan’ny fanolanana na endrika herisetra ara-nofo hafa amin’izao fotoana izao. Ireo tanora lasibatry ny fanodinkodinana zaza tsy ampy taona na misafidy ny handositra no tena voakasik’izany. Ny tsy fahampian'ny fanaraha-maso eny anivon’ny fianakaviana no tena tondroin’ilay mpiasa sosialy ho tompon’antoka amin’izany toe-javatra izany. Ireny ankizy ireny mantsy dia mitady firaiketam-po amin'ny olona ratsy fitondran-tena; noho izany dia zava-dehibe ny fanamafisana ny andraikitry ny ray aman-dreny.
Mba hamerana ny isan’ny tranga mahakasika izany dia manao antso avo mba hisian’ny fanamafisana ny fanabeazana avy amin’ireo ray aman-dreny i Riantsoa Rakotoarimanana, ary koa hetsika fisorohana sy fiarovana ny ankizy sy ny tanora manoloana izany herisetra izany. Ny herisetra an-tserasera dia anisan’ny voatonona ho antony mahatonga herisetra ara-nofo. Manatanteraka antso avo ho amin’ny fanampiana ny isan’ny mpiasa sosialy hafa na mpiasa sosialy manana mari-pahaizana avy amin’ny Minisiteran’ny Fahasalamana na ny Ministeran’ny mponina ihany koa izy, mba hampitomboana ny ekipa eny amin’ny Centre Vonjy.
« Ny tiako indrindra amin'ny asako dia ny fahatsapana fa ny ankizy iray iharan'ny herisetra ara-nofo sy ny ray aman-dreniny dia nahatratra ny dingan’ny faharetana, » hoy hatrany izy. Tamin'ny taona 2023, noho ny fandraisan’andraikitr’izy ireo dia ankizy niharan'ny herisetra ara-nofo miisa 982 no nahazo fanohanana ara-tsaina. Tranga 669 no nalefa tany amin’ny « Maison de droit » mba ho raisiny an-tànana. 831 tamin’izy ireo no niverina soa aman-tsara teny anivon’ny sekoly. Fanohanana fianakaviana 770 no nahomby vokatry ny fanelanelana teny anivon'ny fianakaviana ary farany dia ankizy sy tanora miisa 695 no afaka nandray soa tamin'ny fanabeazana ara-pananahana.
