ការអប់រំ
ការអប់រំប្រកបដោយគុណភាព និងបំណិនជីវិតសម្រាប់កុមារគ្រប់រូប
- Available in:
- English
- Khmer
បញ្ហាប្រឈម
កុមារគ្រប់រូបមានសិទ្ធិរៀនសូត្រ មិនថាពួកគេស្ថិតនៅក្នុងកាលៈទេសៈបែបណានោះឡើយ។ ការផ្តល់ការគាំទ្រគ្រប់គ្រាន់ដល់ការរៀនសូត្ររបស់កុមារ មានសារៈសំខាន់យ៉ាងខ្លាំង ដើម្បីឲ្យពួកគេអាចអភិវឌ្ឍខ្លួនឈានទៅសម្រេចបានសក្តានុពលរបស់ពួកគេ។ ទោះជាយ៉ាងនេះក៏ដោយ នៅប្រទេសកម្ពុជា មានកុមារី និងកុមារាជាច្រើននាក់ ពុំបានរៀនសូត្រគ្រប់គ្រាន់ ជាពិសេសកុមារដែលរស់នៅក្នុងតំបន់ក្រីក្រនៅជនបទ និងទីប្រជុំជន។
ប្រទេសកម្ពុជា បានសម្រេចនូវវឌ្ឍនភាពយ៉ាងគាប់ប្រសើរ ក្នុងការផ្តល់ការអប់រំដល់កុមារបស់ខ្លួន។ ចាំតាំងពីឆ្នាំ២០០៧មក ចំនួនកុមារដែលបានចុះឈ្មោះចូលរៀនក្នុងកម្មវិធីអប់រំកម្រិតមត្តេយ្យសិក្សាកើនឡើងទ្វេដង។ ចំនួនកុមារដែលចុះឈ្មោះចូលរៀនក្នុងកម្រិតអប់រំបឋមសិក្សាកើនឡើងពី ៨២ ភាគរយក្នុងឆ្នាំ១៩៩៧ ដល់ជាង ៩៧ ភាគរយក្នុងឆ្នាំសិក្សា ២០១៧/១៨។
ទោះជាមានវឌ្ឍនភាពបែបនេះក៏ដោយ កុមារនៅកម្ពុជា នៅពុំទាន់រៀនទាន់ស្តង់ដានៃការរៀនសូត្រដែលអាចទទួលយកបាន ស្របទៅតាមអាយុរបស់ពួកគេទ្បើយ។ នៅកម្រិតបឋមសិក្សា មានកុមាររៀនថ្នាក់ទី៣ ជិត ២៥ ភាគរយពុំចេះសរសេរសូម្បីតែពាក្យមួយម៉ាត់នៅក្នុងតេស្តសរសេរតាមអាន។ កុមារអាយុពី ៣ ទៅ ៥ឆ្នាំ ត្រឹមតែ ២៧ ភាគរយតែប៉ុណ្ណោះ ដែលមានការអភិវឌ្ឍចំណេះដឹងអក្សរ និងលេខនព្វន្តស្របទៅតាមអាយុរបស់ពួកគេ ហើយមានក្មេងជំទង់ ៥៥ ភាគរយបោះបង់ចោលការសិក្សា មុនពេលពួកគេមានអាយុ ១៧ឆ្នាំ។
កុមារអាយុពី ៣ ទៅ ៥ឆ្នាំ ចំនួន ៤៣ ភាគរយ បានចុះឈ្មោះចូលរៀនក្នុងកម្មវិធីអប់រំកុមារតូច (២០១៧/១៨)។
កុមារនៅកម្ពុជា នៅបន្តរៀនយឺត ដោយសារមូលហេតុជាច្រើន ដូចជាការពុំបានត្រៀមខ្លួនឲ្យបានគ្រប់គ្រាន់សម្រាប់ចូលរៀន គុណភាពទាបនៃការរៀន និងបង្រៀនដែលកុមារទទួលបាន និងការមករៀនមិនទៀងទាត់។ បញ្ហាទាំងអស់នេះ ទីបំផុតបានធ្វើឲ្យកុមារជាច្រើននាក់បោះបង់ចោលការសិក្សា។
ការរៀនសូត្រមិនគ្រប់គ្រាន់នៅឆ្នាំដំបូងៗ គួបផ្សំនឹងការពុំទទួលបាអាហារូបត្ថម្ភឲ្យបានគ្រប់គ្រាន់ផង ធ្វើឲ្យកុមារជាច្រើននាក់អភិវឌ្ឍខ្លួនយឺតយ៉ាវ។ ចំនួនគ្រូមានសមត្ថភាពមិនគ្រប់គ្រាន់ ហើយគុណភាពនៃបរិស្ថានរៀនសូត្រនៅមានកម្រិតទាប។ លើសពីនេះ ហេដ្ឋារចនាសម្ព័ន្ធជាមូលដ្ឋាន ដូចជាបរិក្ខារអនាម័យ និងទឹកស្អាត នៅខ្វះខាតនៅឡើយ ដែលបង្កផលប៉ះពាល់ជាពិសេសដល់ក្មេងស្រីជំទង់ និងកុមារពិការ។ អំពើហិង្សា ក៏ជាបញ្ហាមួយនៅតាមសាលារៀនផងដែរ ដោយសារតែគ្រូនៅប្រើប្រាស់ការដាក់ទណ្ឌកម្មរាងកាយលើសិស្ស។ កុមារពិការ នៅប្រឈមនឹងការរើសអើង។ ឪពុកម្តាយជាច្រើននាក់ នៅមិនយល់ពីតម្លៃនៃការអប់រំ ហើយភាគច្រើនពុំមានលទ្ធភាពបញ្ជូនកូនទៅរៀនឡើយ ជាពិសេសនៅតាមតំបន់ជនបទ និងតំបន់ជួបការលំបាក។
ការអប់រំគឺជាការវិនិយោគលើអនាគតកុមារ និងប្រទេសជាតិ
ជារួម មានកុមារី និងកុមារាជាច្រើននាក់ បន្តនៅក្រៅសាលានៅគ្រប់កម្រិតភូមិសិក្សាទាំងអស់ ចាប់ពីកុមារតូច រហូតដល់វ័យជំទង់។ កុមារភាគច្រើន បោះបង់ចោលការសិក្សាមុនពេលឡើងដល់កម្រិតមធ្យមសិក្សា។ កុមារី និងកុមារាមកពីមកគ្រួសារ និងសហគមន៍ងាយរងគ្រោះ នៅមានការលំបាកក្នុងការសម្រេចសក្តានុពលខ្លួន ដោយពួកគេជួបនឹងការប្រឈមជាច្រើនដើម្បីទៅរៀន និងបន្តរៀន។
ជាការចាំបាច់ណាស់ ត្រូវមានកិច្ចខិតខំប្រឹងប្រែងបន្ថែមទៀត ដើម្បីជួយឲ្យកុមារទៅរៀន និងបន្តរៀនបាន។
ដំណោះស្រាយ
ការពង្រឹងភាពជាអ្នកដឹកនាំ គុណភាព និងការបង្រៀន និងការកសាងបរិស្ថានសាលារៀនដែលធ្វើឲ្យកុមារមានសុខភាពល្អ ជួយជំរុញទឹកចិត្តឪពុកម្តាយឲ្យបញ្ជូនកូនៗពួកគេទៅសាលារៀន និងលើកទឹកចិត្តសិស្សឲ្យបន្តរៀនសូត្រ។ យូនីសេហ្វ បន្តកិច្ចសហការជាមួយក្រសួងអប់រំ យុវជន និងកីឡា និងដៃគូដទៃទៀត ដើម្បីធានាយ៉ាងណាឲ្យកុមារ អាចទៅរៀន និងបន្តរៀនបាន ហើយសំខាន់ជាងនេះទៀតគឺដើម្បីធានាថាពួកគេអាចរៀនសូត្រប្រកបដោយគុណភាព។
ការអប់រំមានសារៈសំខាន់ចំពោះការអភិវឌ្ឍរបស់ប្រទេសកម្ពុជា។ យុទ្ធសាស្រ្តអភិវឌ្ឍន៍របស់ប្រទេសនេះ ផ្តោតការយកចិត្តទុកដាក់លើប្រជាពលរដ្ឋវ័យក្មេង ពោរពេញដោយភាពស្វាហាប់ និងចល័តភាព ដោយចាត់ទុកពួកគេជាអ្នកចូលរួមចំណែកដ៏សំខាន់ដល់ការអភិវឌ្ឍ និងកំណើនសេដ្ឋកិច្ចប្រកបដោយចីរភាព។ រដ្ឋាភិបាលបន្តវិភាជន៍ថវិការដ្ឋ ក្នុងចំនួនមួយដ៏ច្រើនសម្រាប់វិស័យអប់រំ ហើយយូនីសេហ្វ កំពុងប្រើប្រាស់ឱកាសបច្ចុប្បន្ននេះ ដើម្បីធ្វើកំណែទម្រង់វិស័យអប់រំ។
ដើម្បីធានាថាកុមារគ្រប់រូបអាចរៀនសូត្របាន យើងត្រូវផ្តោតការយកចិត្តទុកដាក់លើការលើកកម្ពស់លទ្ធភាពទទួលបានការអប់រំប្រកបដោយសមធម៌ និងបរិយាបន្ន សម្រាប់កុមារពិការ កុមារជនជាតិដើមភាគតិច និងកុមារដែលរស់នៅតំបន់ក្រីក្រនៅជនបទ និងទីប្រជុំជន។
ការអប់រំ ផ្តល់ឲ្យកុមារនូវផ្លូវចាកចេញពីភាពក្រីក្រ និងឆ្ពោះទៅរកអនាគតដែលពោរពេញដោយស្ថិរភាព និងក្តីសង្ឃឹម។
លុបបំបាត់ឧបសគ្គរារាំងដល់ការទទួលបានការអប់រំ
យូនីសេហ្វ សហការជាមួយរាជរដ្ឋាភិបាល និងដៃគូដទៃទៀត ដើម្បីផ្តល់ឲ្យកុមារគ្រប់រូបនូវលទ្ធភាពទទួលបានការអប់រំប្រកបដោយសមធម៌ និងបរិយាបន្ន។ នេះមានន័យថាយើងលុបបំបាត់នូវឧបសគ្គដែលរារាំងមិនឲ្យកុមារអាចទៅរៀនបាន ដូចជាភាពក្រីក្រ ភាពនៅដាច់ស្រយាល ការមាក់ងាយ និងការរើសអើងជាដើម។
ការតែជាក់លាក់ទៅទៀតនោះ យើងគាំទ្ររាជរដ្ឋាភិបាលដើម្បីផ្តល់៖ អាហារូបករណ៍ដល់កុមារមកពីគ្រួសារក្រីក្រ ដើម្បីឲ្យពួកគេអាចបន្តទៅរៀនបាន ជាជាងបោះបង់ចោលការសិក្សាទៅរកការងារធ្វើ ទទួលបានសេវាអប់រំកុមារតូចប្រកបដោយគុណភាព ជាពិសេសនៅតាមតំបន់ជនបទដាច់ស្រយាល ផ្តល់នូវសម្ភាររូបវន្តក្នុងសាលារៀនដែលកុមារី និងកុមារាទាំងមានពិការភាព ទាំងគ្មានពិការភាព ងាយស្រួលប្រើប្រាស់ សាលារៀនដែលមានបរិក្ខារអនាម័យ និងទឹកស្អាតគ្រប់គ្រាន់ ដើម្បីកុំឲ្យកុមារឈឺដោយសារប្រើប្រាស់ទឹកកខ្វក់ ឬអនុវត្តទម្លាប់គ្មានអនាម័យ ហើយក្មេងស្រីជំទង់មិនបោះបង់ចោលការសិក្សាដោយតែពួកគេពុំអាចរក្សាអនាម័យពេលមករដូវឲ្យបានត្រឹមត្រូវនៅក្នុងសាលារៀន គ្រូអប់រំពហុភាសាដែលមានសមត្ថភាពសម្រាប់សិស្សជនជាតិដើមភាគតិច ជាពិសេសនៅខេត្តភាគឦសាន និងគ្រូបង្រៀនដែលមានជំនាញបង្រៀនកុមារពិការ។
ការយកចិត្តទុកដាក់ចំពោះគុណភាពបង្រៀន និងរៀន
រួមគ្នាជាមួយរាជរដ្ឋាភិបាល និងដៃគូដទៃទៀត យើងធ្វើការងារដើម្បីបង្កើនគុណភាពអប់រំ ដើម្បីឲ្យកុមារកម្ពុជាអាចចាប់ផ្តើមដំណើរផ្លូវរៀនសូត្រពេញមួយជីវិតបាន។ យើងស្វែងរកការគាំទ្រ ដើម្បីឲ្យមានការវិនិយោគផ្នែកហិរញ្ញវត្ថុ ដើម្បីឲ្យមានការផ្តល់ការបណ្តុះបណ្តាលកាន់តែល្អប្រសើរដល់គ្រូបង្រៀន ចាប់ពីកម្រិតអប់រំកុមារតូច រហូតដល់កម្រិតមធ្យមសិក្សា។ យុទ្ធនាការកៀងគរ និងការបណ្តុះបណ្តាលរបស់យើង ជួយជំរុញឲ្យមានការដាក់វិន័យបែបវិជ្ជមាននៅក្នុងថ្នាក់រៀន ដោយពុំចាំបាច់ប្រើប្រាស់ការដាក់ទណ្ឌកម្មលើរាងកាយ ហើយយើងលើកទឹកចិត្តឲ្យអ្នកគ្រប់គ្រងសាលា និងគ្រូបង្រៀនប្រើប្រាស់ការដាក់វិន័យបែបវិជ្ជមានជំនួសឲ្យការប្រើប្រាស់ការដាក់វិន័យបែបហិង្សា។ យើងក៏ជំរុញឲ្យមានការចិញ្ចឹមបីបាច់កូនបែបវិជ្ជមាននៅក្នុងសហគមន៍ផងដែរ។
យើងគាំទ្រក្រសួងអប់រំ យុវជន និងកីឡា ក្នុងការកែសម្រួលកម្មវិធីសិក្សាជាតិ រួមទាំងកម្មវិធីសិក្សាលម្អិត ស្តង់ដានៃការរៀនសូត្រ ការបណ្តុះបណ្តាលគ្រូ និងសៀវភៅសិក្សា ដើម្បីឲ្យមានការបញ្ចូលបំណិនសតវត្សរ៍ទី២១ ទៅក្នុងប្រព័ន្ធអប់រំរបស់កម្ពុជា។ អាទិភាពមួយ ក្នុងចំណោមអាទិភាពសំខាន់ៗរបស់យើង គឺបញ្ចូលសុខភាព អាហារូបត្ថម្ភ និងបំណិនជីវិតទៅក្នុងកម្មវិធីសិក្សា ដើម្បីឲ្យក្មេងជំទង់អាចរៀនសូត្រពីរបៀបក្លាយខ្លួនទៅជាមនុស្សពេញវ័យ ដែលមានសុខភាពល្អ មានសមត្ថភាព និងប្រកបដោយការទទួលខុសត្រូវ។
ការសាងភាពជាអ្នកដឹកនាំ និងផ្តល់ការគាំទ្រ
ចាប់ពីកម្រិតរដ្ឋាភិបាល រហូតដល់កម្រិតសហគមន៍ បរិយាកាសអំណោយផលដែលផ្តល់នូវការជួយជ្រោមជ្រែង មានសារៈសំខាន់យ៉ាងខ្លាំង ដើម្បីបង្កើតជំនាន់យុវវ័យកម្ពុជាមួយដែលអាចក្លាយទៅជាសមាជិកដ៏សកម្មនៅក្នុងសហគមន៍។
ដោយមានការចូលរួមពីដៃគូរបស់យើង យើងធ្វើការងារដើម្បីកសាងភាពជាអ្នកដឹកនាំ និងគ្រប់គ្រងប្រកបដោយប្រសិទ្ធភាពដល់មន្ត្រីរាជរដ្ឋាភិបាល និងមន្ត្រីអប់រំ។ យើងផ្តល់ការបណ្តុះបណ្តាលបច្ចេកទេស ដើម្បីឲ្យមន្ត្រីអាចរៀបចំថវិកា និងរៀបចំផែនការ ដើម្បីបង្កើតនូវសេវាអប់រំ ដែលមានគុណភាព បរិយាបន្ន សមធម៌ និងឆ្លើយតប ហើយយើងគាំទ្រឲ្យអ្នកគ្រប់គ្រងសាលារៀន និងគ្រូបង្រៀនចេះរៀបចំផែនការ និងបែងចែកធនធានរបស់ពួកគេឲ្យកាន់តែមានប្រសិទ្ធភាព។
ប៉ុន្តែយើងក៏ដឹងផងដែរថា វឌ្ឍនភាពពិតប្រាកដកើតចេញពីការជំរុញឲ្យមានការចូលរួមពីគ្រួសារ និងសហគមន៍ ដូច្នេះហើយបានជាយើងធ្វើការងារជាមួយនឹងសមាជិកនៃគណៈកម្មការទ្រទ្រង់សាលារៀន ដើម្បីជំរុញឲ្យមានការផ្តល់ការអប់រំដល់គ្រួសារ និងគាំទ្រដល់កិច្ចខិតខំប្រឹងប្រែងរបស់សហគមន៍ ដើម្បីលើកទឹកចិត្តដល់ឪពុកម្តាយឲ្យផ្តល់តម្លៃដល់ការអប់រំ។ យើងធ្វើបែបនេះ ក្នុងគោលបំណងជំរុញឲ្យមានតម្រូវការសេវាអប់រំ ដើម្បីឲ្យកុមារី និងកុមារាកាន់តែទទួលបានការជួយជ្រោមជ្រែងពីឪពុកម្តាយ និងសហគមន៍របស់ពួកគេ ដែលអាចឲ្យពួកគេអាចចូលរៀន និងបញ្ចប់ការអប់រំកុមារតូច និងការអប់រំកម្រិតបឋមសិក្សាបាន។