Early learning: Bigyan ng magandang simula ang ating anak
Mga masayang paraan para maging maayos ang kanyang pagpasok sa child development center
Ang unang mga taon ng bata ang pinaka kritikal na panahon sa paglaki niya. Ito ang panahon kung kailan hinuhubog ang kanyang pag-iisip at nagsisilbing pundasyon ng kanyang kinabukasan. Sa bawat sandali ng interaction niya sa kaniyang kapaligiran, marami siyang natututunan, sa bilis na hindi na muli mauulit. Kaya ang kalidad ng mga karanasan ng bata sa mga unang taon ng buhay ay napakahalaga sa kanyang paglaki.
Ang halaga ng pagpasok sa child development centers
- Marami siguro sa atin ang akala ay paglalaro lamang ang nagagawa nila sa child development centers. Pero alam niyo bang ang paglalaro ay nakatutulong sa pagdevelop ng katawan, isipan at emosyon ng ating anak?
- Ang paglalaro ng bola, halimbawa, ay tumutulong sa kanilang kakayanan gumalaw at pinatitibay nito ang kanilang balance at body coordination. Sa alphabet at number blocks naman, makikilala nila ang mga letters at numbers para matuto silang magsulat at magbilang pag tuntong nila sa primary school.
Ayon din sa datos, kapag ang ating anak ay nakapag-aral sa preschool, mas made-develop ang kaniyang foundational skills na kailangan para maging mahusay sa eskwelahan at mas malamang na hindi umulit ng grado o mag drop out.
Paghahanda para sa K-12 schooling
Ang maagang pagpukaw at pagkatuto ay mahalaga para mabuo ang foundational skills ng ating anak at maging handa siya para sa paaralan. Ang early learning ay magbibigay ng pinakamabuting simula sa buhay niya. Nakatutulong ito para maabot niya ang kaniyang full potential.
Kapag ang anak natin ay hindi nabigyan ng early learning opportunity para sa kaniyang brain development, maaaring mahirapan siya sa pag-aaral, at sa paghahanapbuhay pagtanda.
Kaya mga parents, i-enroll natin sa child development centers ang ating mga anak, lalo na pag sila ay nag-three years old. Mahalaga ito para sila ay maging handa sa kanilang K-12 schooling.
Ito ay isang malaki at exciting na milestone, pero maaaring maging mahirap sa umpisa para sa ating anak na mawalay sa atin.
May mga masayang paraan para maging maayos ang kanyang pagpasok sa child development center:
- Sabay bisitahin ang center bago pa man magsimula ang klase
Maglaro sa playground at bisitahin ang classroom. Sa ganitong paraan, magiging pamilyar na sa ating anak ang eskwelahan sa unang araw ng pasukan
- Makipagkaibigan sa mga classmates
Maaaring mag-schedule ng playdate ng mga bata para magkakilala sila bago magumpisa ang pasukan
- Maglaro ng eskwe-eskwelahan sa bahay
Magpanggap na teacher at mag story time, turuan ang ating anak na kumanta ng mga nursery rhyme, at mag nap time. Pwede din na siya ang magkunwaring teacher. Sa ganitong laro, maiisip niya na masaya ang school at hindi siya dapat matakot.
- Gawing laro ang paghahanda sa pagpasok
Kantahin ang pagsara ng mga butones at zipper ng damit, pagsuot ng backpack o ng sapatos
- I-share ang iyong karanasan
Ikwento mo sa anak ang mga naging karanasan mo sa pre-school at ang mga espesyal mong alaala. Pwede din ipakita mo ang lumang pictures mo
- Gumawa ng bagong routine
Magsanay ng bagong oras ng pagtulog at pag-gising ilang linggo bago mag umpisa ang klase para pareho kayong makapag-adjust. Maaari rin magsanay pumili ng damit na susuotin sa gabi pa lamang, at kumain ng breakfast nang sabay sa umaga
- Pakinggan ang ating anak
Tanungin ang anak kung ano ang nararamdaman niya sa pagpasok sa eskwelahan at ipanatag ang loob niya na normal lang makaramdam ng excitement, kaba at iba pang emosyon. Sabihin din na susunduin mo siya pagkatapos ng klase at pag-usapan ang mga magiging routine
- Ihanda ang goodbye plan
Ang magpaalam sa isa’t isa ay mahirap para sa parents at sa anak. Gawing madali at positive ang pagpapaalam. Ipanatag ang loob ng anak na di magtatagal ay magkikita ulit kayo. Pwede rin gumawa ng routine para sa ikakaluwag ng kanyang loob tulad ng pagkanta ng sabay o ang special handshake.
Paghahanda para sa parents
Marami sa ating mga magulang ang marahil nag-iisip na mahirap i-enrol ang ating anak sa child development center dahil busy tayo. Ngunit maraming mga praktikal na paraan para magawa natin ang nakapakahalangang hakbang na ito para sa ating anak:
- I-schedule ang trahabo at gawaing bahay ng ayon sa oras ng klase sa center.
- Maging produktibo habang naghihintay sa anak. Pwedeng mag plano or gumawa ng schedule ng mga gawain o maglaan ng “me-time” tulad ng pagbabasa or pagtawag sa kabigan.
- Kumuha ng suporta sa pamilya kung kinakailangan ng tulong. Makipagcoordinate kung sino ang maghahatid o susundo sa anak sa center.
Tandaan, walang perfect parent, pero isang mabuting hakbang bilang magulang ang bigyan ng early learning opportunity ang ating anak para sa mahusay na simula ng kaniyang buhay.
