Bakunado ang bawat bata: Paano ginawa ng Baseco?
Ang lakbay patungong "no missed child"
Maituturing na high-risk sa mga nakakahawang sakit at sakuna ang Barangay 649 o Baseco, Manila dahil dikit-dikit ang mga kabahayan, lalo sa looban na halos wala nang mahulugang karayom. Karamihan sa kanila ay mahihirap. Pero sa kabila nito, naipagmamalaki nilang bakunado ang bawat bata dito. Kahit noong kasagsagan ng measles at polio outbreak nung 2019, walang batang hindi nabakunahan dito. Maipagmamalaki nilang wala sila kahit isang “missed child”.
Pero ayon sa kanilang mga Barangay Health Workers (BHWs), hindi ito naging madaling proseso.
Masalimuot na simula
Sina Jinky, Sally, Cristina, Wahida, at Rosita ang unang batch ng BHW na sumali sa BHW Training nung 2016 and Bakuna Champions nung 2017. Ito ay mga training ng Lungsod ng Maynila na inilunsad ng ng Department of Health at sinuportahan ng UNICEF Philippines, para mapalawak ang kanilang kaalaman sa pagbabakuna. Higit sa lahat, tinuruan sila ng epektibong komunikasyon para makahikayat ng mga magulang na pabakunahan ang mga bata sa tamang schedule.
Karaniwan daw dati ang pagbabanta sa kanila sa tuwing nagtatawag sila ng mga magulang para pabakunahan ang mga anak nila. “Minsan nga hinahabol kami ng martilyo,” saad ni Wahida. Pinagsasarahan din daw sila ng pintuan.
Bagama’t problemado sila sa pangungumbinsi, alam nilang mas malaki ang banta ng nakakahawa at nakamamatay na sakit tulad ng tigdas, rubella at polio. 60 to 70 % lamang ng mga bata ang bakunado sa Baseco bago mag 2016, malayo sa 95% na target. Ito ang naghikayat sa kanila sumali sa training.
Dahil dito, lumalim ang pag-unawa nila sa mga pinagdadaanan ng bawat magulang. Kaya’t sabi ni Jinky, “Pati pag-follow-up ng schedule ng pagbabakuna, kami na din nagpapaala sa mga magulang para hindi makalimutan.”
Hinahabaan nila ang pasensya sa mga mas kumplikado na mga sitwasyon.“ Tulad sa sitwasyon kung saan isa sa mga mag-asawa ay hindi pumayag na pabakunahan yung mga bata, binibigyan namin sila ng pagkakataon mag-usap at mag-desisyon. Andyan lang kami para sagutin ang kanilang mga tanong. Laging may pag-uunawa ang pakikitungo namin sa kanila,” paliwanag ni Rosita.
Patuloy umaani ng bunga
Sa kasalukuyan, 49 na silang BHW mula sa 5 nung April 2017. Hindi mapagkakaila na malaking papel na ginagampanan nila sa pagbabakuna ng bawat bata. At ang suporta ng lokal na opisyal sa mga BHW ay mahalaga din. “Kami ang nag mo-mobilize para sa mga nurse, kasi kahit mga loob-looban pinapasok namin para maghanap ng mga batang kailangan bakunahan,” paliwanag ni Sally. “Yung humabol sa amin dati ng martilyo, nakikipag-apir na sa amin ngayon,” masayang ibinalita ni Wahida.
Ramdam na ramdam ng mga residente ang pagkalinga ng mga BHW sa komunidad. Napansin ni Grace, isang nanay, aktibo ang mga BHW sa kanilang trabaho, “Yung mga BHW kasi umiikot talaga sila para mag-remind sa mga nanay na pumunta sa health center para mapabakunahan ang kanilang mga anak. Mas gusto ko tumira dito.”
Sa kabila ng panibagong banta ng mga nakakahawang sakit tulad ng tigdas, rubella, at polio, handang-handa ang Baseco na tugonan ito dahil sa tiyaga at husay ng mga BHW. Nagawa na nila dati at kayang gawing muli.